[ندعوك للتسجيل في المنتدى أو التعريف بنفسك لمعاينة هذه الصورة]


بعد ضغط المؤتمر ونشر كل المعلومات اللي قدرنا عليها عن بلايستيشن 4، حصلت لي في صباح اليوم التالي فرصة اجلس واسولف مع مايكل دني (Michael Denny) نائب رئيس استديوهات سوني العالمية، وكانت جلسة حوارية موجود فيها عدد من الاعلاميين من اوروبا.

الاجتماع كان غير رسمي الى حد كبير، لكن اسلوب مسؤول سوني (الاستاذ مايكل) كان يحسسك انك تتكلم مع سياسي من كثر مراوغته في الأجوبة. اذا سألته سؤال ما يبي يجاوبه (زي كثير من الاسئلة اللي انطرحت)، بياخذ فيك لفه طويله في الجواب بكلام عام يحسّسك انه جالس يجاوبك، بس اذا خلص تكتشف انه ما اعطاك ولا شي تقدر تستفيد منه كاعلامي. محافظ على سرية المعلومات بشكل ذكي.

لكن مع ذلك قدرنا نسحب منه بعض المعلومات. الطاوله كان فيها 10 اعلاميين تقريباً، بس ما كان فيه الا 4 يطرحون اسئلة بشكل مستمر (وانا منهم)، وهالشي اعطانا فرصه اننا نحاول نحشره شوي بالاسئلة.

السواليف كانت طويلة وفيها اسئلة كثيرة، مع وجود اسئلة تنطرح بانجليزي مكسّر مخلوط بلهجة اوروبية ما يفهمها مسؤول سوني ويضطر الاعلامي يعيدها وحنا نناظر فيهم وهم ويحاولون يفهمون بعض. فبدال ما اكتب كل الاسئلة اللي انطرحت واضيّع وقتك فيها، بخلي الموضوع مقتصر على الاشياء المهمة فقط، والاجوبه مختصرة:


سألته: هل خاصة Remote Play (لعب العاب البلايستيشن 4 على الفيتا عن بعد) بتكون متطلب أساسي، ام ان المطوّر يختار اذا حاب يدعمها او لا؟

جاوب: فضّلنا اننا نترك دعم هذي الخاصية للمطوّر بدال ما نفرضها عليهم كلهم.

(ما اعجبني جوابه. هذا الشي يعني انه احتمال تصير الالعاب اللي تدعم هالخاصية قليلة وما يتم الاستفادة منها بشكل كامل)

سأله اعلامي: هل راح تعطون مطوّرين الالعاب القدرة على انهم يربطون العابهم بيوزر او جهاز معيّن، بحيث انكم تقضون على سوق الالعاب المستعمله؟

جاوب: ما اعتقد انه الوقت المناسب للتحدّث عن اي شي له علاقه عن كيف راح نحمي حقوق المطوّرين، لكن راح نعلن كل شي في وقته.

(الله يستر، شكلهم ناوين على شي في هالخصوص)

سأله اعلامي: عندنا في اسبانيا الانترتن جيّد، لكنه ماهو سريع زي امريكا مثلاً. هل معناتها اننا ما راح نستفيد من خدمة GaiKai الخاصة ببث الالعاب؟

جاوب: استحواذنا على خدمة Gaikai كان بسبب كفاءة الخدمة وقدرتها على خدمة اللاعبين بشكل مميّز، والأكيد اننا راح مع الوقت ندعم الخدمة في كل مكان بشكل أفضل.

(اتمنى انهم فكروا فعلاً في هالنقطه وما ركزوا على السوق الامريكي فقط)

سألته: هل راح نشوف اي تطوّر في موضوع التروفيز؟

(جوابه كان مراوغ جداً لدرجة اني ما طلعت بأي معلومة منه، وبالتالي راح اوفّر عليك الوقت وما راح اكتبه)

سأله اعلامي: هل بتكون امكانية ان لاعبين بلايستيشن 3 وبلايستيشن 4 يلعبون مع بعض اونلاين اذا نزلت نفس اللعبة على الجهازين؟

جاوب: من الناحية التقنية هذا الشي ممكن، لكن دعمه راجع للمطوّر

(كويس، عشان اللي يشترون بلايستيشن 4 بدري ما يجلسون يلعبون اونلاين لحالهم في الالعاب الكبيرة مثل فيفا وكول أوف دوتي)

سألته: ذكرتوا في المؤتمر ان تصميمكم للجهاز كان مرتبط بشكل مباشر باراء واقتراحات المطوّرين، هل سطح اللمس (touchpad) الموجود في يد التحكّم الجديدة شي سويتوه بناءاً على ارائهم؟ او انها تقنية تعتقدون انتم انها فكرة جيده وتبون المطوّرين يستكشفونها؟

جاوب: سؤال ممتاز. في الواقع كان خليط بين الاثنين، بين الاشياء اللي نعرف ان المطورين يحتاجونها، وبين الاشياء اللي نبي نضيفها لتجربة بلايستيشن.

(اتمنى ما تكون خاصية يحاولون يفرضونها على المطوّرين بشكل او بآخر، زي شاشة اللمس في الفيتا)

سألته: من يوم ما نزل بلايستيشن 3 الى الآن ما غيرتوا واجته نهائياً، عكس الاكس بوكس اللي دايم يحدّث ويطوّر واجهة النظام بشكل مستمر. هل ناوين تغيرون من اسلوبكم في البلايستيشن 4؟

جاوب: تركيزنا الكامل حاطينه حالياً في اطلاق الجهاز، فصعب اجاوبك على شي زي كذا من الآن.

(اذا ما خططوا لهالموضوع من الآن فهذي مصيبه. اتمنى تكون مجرد مراوغه)

سألته: هل ناوين تدعمون اي لغات اضافية في الجهاز؟

جاوب: أكيد، دائماً نركز على الوصول الى مناطق اكثر في العالم، وكان لنا جهود كبير في دعم العديد من اللغات سابقاً، وبنستمر في هالشي مستقبلاً.

(للأسف ما اكّد اذا البلايستيشن 4 يدعم عربي او لا، وفضّل يخلي اجابته مفتوحه)

سأله اعلامي: هل راح تدعمون دقّة 4K في الالعاب؟

جاوب: لا، فقط في الفيديو.

(كويس. سبب آخر اني ما اشتري تلفزيون 4K!)

سألته: البعض اعتقد امس ان يد التحكّم الجديدة ما راح تشتغل بدون الكاميرا، هل هذا صحيح؟

جاوب: لا طبعاً، تقدر تستخدمها بدون الكاميرا زي يد التحكم العادية.

(اشوا!)

سأله اعلامي: بخصوص خدمة Gaikai، هل ناوين تفتحون سيرفرات لها في مناطق مختلفة حول العالم بحيث يصبح ادائها افضل في كل مكان؟

جاوب: راح ندعم ونتوسّع في خدمة Gaikai بشكل كبير مستقبلاً، وبنعلن كل شي في وقته.

(لو سووها فعلاً بتكون خطوه جداً ممتازه وتخدم اداء الخدمه بشكل كبير)

سألته: في المؤتمر وريتونا ملف شخصي لاحد اللاعبين بمعلومات حقيقيه، هل راح تفرضون على اللاعبين استخدام معلومات حقيقية؟ مثل انكم تتحققون من هوية اللاعب عن طريق الفيسبوك مثلاً؟

جاوب: لا ابداً، هذا الشي بيكون اختياري. اي احد يبي يحافظ على سرية شخصيته ممكن يستمر بهالشي زي البلايستيشن 3.

(للأسف ما اعجبتني هالنقطة. لو اجبروا الكل يستخدم معلوماته الحقيقية كان قل عدد الناس اللي يجلسون يسبون بشكل عشوائي في الاونلاين، لان كل واحد بيفكّر مية مره قبل يتكلم)

سأله اعلامي: هل الكاميرا الخاصة ببلايستيشن 4 بتتابع حركة الجسم بشكل دقيق مثل الكنكت؟

جاوب: هذا الشي راجع للمطوّرين.

(كيف راجع للمطوّرين؟ مو المفروض يكون عارف امكانيات الكاميرا؟ عموماً واضح انها كانت مراوغه للسؤال لا اكثر)

سألته: بما انكم غيرتوا عملية التطوير بحيث تصير اسهل بكثير على البلايستيشن 4 وعلى هيكلة مختلفه عن بلايستيشن 3، هل معناتها ان مطورين بلايستيشن 3 ما راح يستفيدون من خبرتهم في بلايستيشن 4؟

جاوب: التطوير على البلايستيشن 4 اسهل اجمالاً بالنسبة لجميع المطوّرين، ولكن اكيد ان مطوّرين بلايستيشن 3 بيستفيدون من خبرتهم السابقة وبتخدمهم في التطوير على بلايستيشن 4.

(كنت خايف ان مطوّرين بلايستيشن 3 اللي اتقنوا التطوير على الجهاز بيضطرون انهم يتعلمون التطوير على بلايستيشن 4 من الصفر. هذا ممكن يعطّل عملية التطوير ويقلل عدد الالعاب اللي بتنزل على الجهاز في بدايته)

سأله اعلامي: شفنا امس في المؤتمر تركيزكم بشكل كبير على الجرافيكس، بس ما تشوفون ان الذكاء الصناعي المفروض يكون تركيزكم الاكبر؟ خاصة ان اغلب الالعاب في الجيل الحالي تعتمد على احداث مبرمجه سابقاً ومافيها اي ذكاء.

جاوب: حنا نركز على الذكاء الصناعي ولكن بنفس الدرجة اللي نركز فيها على الاشياء الثانية. ما اعتقد انه المفروض نعطيه اهتمامنا الاكبر، لكن الاكيد انه شي مهم.

(سؤال رهيب صراحه لان فعلاً الاحداث المبرمجه مسبقاً في الالعاب – scripted events – صارت شي مستهلك)

—

وقبل ما يقدر احد يسأل اي سؤال اضافي، تدخلت منظّمة اللقاء واضطرت توقفنا بسبب انتهاء الوقت المحدّد لذلك. وبدأ الاعلاميين يضفون اغراضهم ويقفلون اجهزتهم وكاميراتهم ويخلون المكان.

اجمالاً اتوقع طلعنا بمعلومات ممتازة، واتمنى مع الوقت اذا بدوا يكشفون معلومات اكثر واتضحت الصوره كامله، انه الجهاز يستمر في ابهارنا زي ما ابهرنا الآن، وما تطلع معلومه بايخه تخرب جونا زي ما صار مع البلايستيشن فيتا اول ما نزل.

شاركنا برأيك عن الموضوع في التعليقات!

شكرا لك على الموضوع ونتمنى وصولة الى الدول العربية بسرعة !

منور والله حتا انا استناه

شكرا لك ^_^

العفو منور

شكرااا على الموضوع الجميل

شكرا لك حتا انا استناه

يعطيك الف الف عافيه

موضوع رااائع

وجهود أروع

شكرااااااا لك ع المعلومااات